Mat 26 | WSK | STEP | Jesus den imi suen la ko olekem nunga manaru kutuwuram mu nu iwita nunga maonam,

Matthew 26

Kari bibiya Jesus momon se kuerukko ko den nungurman

(Mark 14:1-2; Luke 22:1-2; John 11:45-53)

1 Jesus den imi suen la ko olekem nunga manaru kutuwuram mu nu iwita nunga maonam, 2 “Nina ikisan tom ilagala namuruk mu Passover ko tom biya tai aratuk, se tom umutang te Kari ko Kuriang kager kari nuguting te betemon se tam kangono te itugumonko.”

3 Tom mu te priest bibiya se kari supuling alo namaman Priest Supuling Caiaphas ko kawam biya mu ningi biguwuman, 4 ale tetela la Jesus ilumon ale momon se kuerukko ko den nungurman. 5 Bare nuna balman, “Ana mel imi Passover ko tom te me betenakko. Kariimet kager patawomon bore ko se.”

Imet bo yu gureng siring yawara wore Jesus ko supuling te waram

(Mark 14:3-9; John 12:1-8)

6 Se Jesus Bethany wonong te kari kumik laera posara Simon mu ko kawam te na nowaram, 7 se imet bo yu kuting manga alabaster te nungurman ale yu gureng ko siring yawara mu ningi langiman mu giam karogo kote tairam, ale yu kuting kuring kulukuam ale yu gureng siring yawara nukung mu Jesus supuling te waram. Yu gureng mu ko koma kalel biya nunguningkiri.

8 Se olekem alo kilek mu aringiman ale nongomang magakaso se balukasan, “Anape ko mel owore am ipi kaposo ya?” makasan. 9 “Ana yu gureng imi koma kalel biya te dianak ale ko manga tanak ale kariimet nungumik mel mena te nunga sangornakko ko mel wore!”

10 Bare Jesus maingkala nononga ikia mu arigam ikiam, ale iwita nunga maonam, “Nina anape ko imet ewere gomang ikup tusan a? Nu munan ningo nunguningkiri wore ani angimik te beteram. 11 Kariimet nungumik mel mena mu tom suen biya nina nengerak bagomonko, bare ani mu tom suen biya nina nengerak me bagirikko. 12 Ani me aga mutim tugusan la, imet imi giram ale yu gureng siring yawara imi te angimik iluwam ale aga nungam. 13 Ani nunguningta ninga manorsam, ali sor koma apareyate nuna aninga den gilalong yawara balu se, bare imet imi mel beteram mu ko dugu duap karogotala balmon se ikimon, ale agotala ko nungamin tugumonko.”

Judas nu Jesus kari bibiya nuguting te bitirukko balam

(Mark 14:10-11; Luke 22:3-6)

14 Asele olekem 12 nunga ningi bo, ko nup Judas Iscariot, mu nu priest bibiya nongote namaram, 15 ale iwita nunga isuam, “Ani Jesus nigiting te bitirik mu anape mel ani aisalko ya?” Se nuna manga silver bilik 30 kauman ale nu tuman. 16 Se nu eng namaram ale tom kuring bo aguwaya mu te nu Jesus kager kari nuguting te bitirukko mu ko ikia to se loaga guruguwakaso.

Jesus ko olekem arungu Passover na naman

(Mark 14:12-21; Luke 22:7-14, 21-23; John 13:21-30)

17 Bread Yeast Mena ko tom biya wore ko tom gira mu tai aratam, se olekem alo Jesus kote taiman ale isarman, “Ana kuwim aparete namanak ale Passover ko na yu nunguru saganakko ya?” ^{▼▼Mat 26:17 Passover ko den: Exodus 12:14-20.}

18 Se nu iwita nunga maonam, “Nina wonong biya mu ningi kasu nagural ale kari bolonga bagoso wore kote namaral ale iwita maonalko, aninga balalko, ‘Kari Biya ko tom tai aratam, se ko olekem arungak nika kawam te Passover ko na namonko balam,’ ma iwita maonalko.”

19 Se olekem alo den Jesus balam umutang eng te beteman, ale Passover na nunguru beteman.

20 Se sor baingam tairam mu Jesus ko olekem 12 arungu na namonko dagiman. 21 Na nowa se Jesus balam, “Ani nunguningta ninga manorsam, nina ningi bo ani kager kari nuguting te aga bitirukkowo,” mam.

22 Se ko olekem alo ninguru nongomang batagakaso. Se suwan suwan nu isarukasan, “Kari Biya, ani ye? Bare ani uwutata me bitirikkowo,” makasan.

23 Se Jesus nunga maonam, “Kari bo ani agarak taiwir suwanta imi ningi ko bread kumin ningi mituwuram, kari borta ani kager kari nuguting te aga bitirukko. 24 Batoga te aniso iwitata, Kari ko Kuriang kumik te aratukko. Bare kari kager kari nuguting te nu bitirukko, mu nu ikup yaman memek nunguningkiri taukkowo. Kari mu nuam tuagu ningi kueram la mu asele yawarakala ale.”

25 Se Judas, kari Jesus kager kari nuguting te bitirukko, mu nu isuam, “Kari Biya, ani ye?” mam.

Se Jesus nu maonam, “Ni balem butata,” mam.

Jesus bread waen ago ko olekem alo nungaram se naman

(Mark 14:22-26; Luke 22:15-20; 1 Cor 11:23-25)

26 Se nuna na nowaman se Jesus bread tam, Kaem aru maonam, ale paogam, ko olekem nungaru se balam, “Tal ale nalko, imi aninga angimik nunguning.”

27 Ale aking yu waen bagunang ago mu tam, Kaem aru maonam, ale nungaru se balam, “Nina singir la nalko. 28 Imi aninga angimik gue, kariimet suen biya nunga memek siwurokko warem se kaparam, se Kaem ko den nuna nogo ko nungam wore te sokel tuam. ^{▼▼Mat 26:27-28 Den imi ago arikko: 1 Cor 10:16. Kaem Kristus ko gue te den aora iru sokel tuam: Heb 8:7-13. Look again at Heb and 1 Cor.} 29 Ani ninga manorsam, ani udagi yu waen imi me naik baga, aninga Ait ko kingdom ningi asele aking iru nengerak naikko,” mam.

30 Ale nuna wur bo ilu gilingiman, ale barasaman Jerusalem beteman arataman Duruk Olive te namaman.

Jesus Peter nu buring tuokko mu balam

(Mark 14:27-31; Luke 22:31-34; John 13:36-38)

31 Se Jesus nunga maonam, “Turom imitang te mu nina suen la nibiring ani aisal, ale parasaral naguralko. Mu awuk, batoga te iwita aniso:

‘Ani sipsip nunga bitua kari morik se kueruk,

se sipsip suen la parasomon ale nagu sapomonko.’ ^{▼▼Mat 26:31 Kaem Zechariah kuring te den imi balam: Zech 13:7.}
32 Bare ani kuerik ale barasik mu te ani girek Galilee sor te namirik, se nina umutang te nama agarak biguwuralko.”

33 Se Peter mu Jesus maonam, “Saki alo mu nika betemonko agi, bare ani agata mu mena nunguningkiri,” mam.

34 Se Jesus Peter maonam, “Ani nunguningta nika manorsam, turom imitang te mu tarak me niaruk la, ni biring ani aisu ale tom ilagala suwan ko balu ni ani me aga ikisam ma balukowo.”

35 Bare Peter balam, “Ani nikerak am kuerikko pa, bare ani ni me ka ikisam ma me balikko.” Se olekem alo suen la den koma suwantala balman.

Jesus Gethsemane ai ngatangakaso

(Mark 14:32-42; Luke 22:39-46)

36 Asele Jesus ko olekem alo arungak kuwim bo Gethsemane masan mu te namaram. Ale nu nunga maonam, “Imi te dagi sagaral se ani owore te namirik ale ngatangirikko,” mam. 37 Ale nu Peter, se Zebedee ko namar ilagala James John ilak mu buta nunga giam se ilak namaman. Se ikup biya nu iram se gomang ninguru nunguningkiri batagakaso. 38 Se nu nunga maonam, “Ani angamang bataga biyala se ko ikup aga iram se kuerikko iwita. Se nina ani agarak imi te baga se marak sinar ago bagaralko.”

39 Ale nu katir aolak ilu kasu namaram ale ali tuagu te dagulam ale koma ali ningi kaparam, se ngatangakaso, “O Ba,” mam, “iwita terong agi mu, aninga angamang ni ikup yaman aninga irokko taiso ewere kutuwurko. Bare ni aninga ikia se angamang me karo tuiko, ni keta ka ikia se ka gemang mu la karo tuiko.”

40 Nu uwuta ngatangaram asele peleram tairam mu ko olekem ilagala suwan mu aniwaman se nungarkam, ale ko nu Peter maonam, “Nina tom katirta hour suwanta ko ani agarak marak sail ago bagaralko me terong e? 41 Sinar to se ngatanga se bagaralko. Ninga ira ariga bo tairuk se te dagulal bore ko. Ninga nengemang motam mu karo tua ko aniso, bare ninga ningimik guang / nengemang motam mu sokel mena.”

42 Se akingtala Jesus peleram namaram ale ngatangakaso, “O Ba,” makaso, “nika gemang ani ikup aninga irokko taiso ewere giekko agi mu, ani am karo kisekko. Ni keta ka ikia gemang la karo tuiko.”

43 Se udagi tala peleram tairam mu ko olekem nomotam ikuwuram se akingtala aniwaman se nungarkam. 44 Se Jesus am nunga beteram ale peleram namaram, ale den koma suwanta giram tom ilagala ko ngatangaram mu borta te tala aking ngatangaram.

45 Asele nu peleram ko olekem alo nongote tairam ale balam, “Nina am ani se neneman sapawasan e? Arigalko, tom tai aratam. Se Kari ko Kuriang kari memek nuguting te betemonko. 46 Se barasal se namanakko! Arigalko, kari ani kager kari nuguting te aga bitirukko mu taiwoso!”

Judas nu Jesus kager kari nuguting te beteram

(Mark 14:43-50; Luke 22:47-53; John 18:3-12)

47 Se Jesus den imi am baluwaram la, olekem 12 nunga ningi bo Judas mu tai aratam. Se kari motam biya batir se tam mel giman ale nu ilak taiman. Priest bibiya se kari bibiya alo kari mu nunga awuman se tai gilingiman. 48 Judas mu maingkala iwita nunga maonam, “Ani kari bo iluwek ale kol te musuk maik, mu nina ikial mu kari borta. Se nina kari umutang iluwalko,” mam.

49 Se nuna tai arataman mu Judas dirmam Jesus kote namaram ale maonam, “Kari Biya, turom yawara,” ma se iluwam ale kol te musuk mam.

50 Se Jesus nu maonam, “Aga bo, ni mel bitarko tairem mu tairatela bitarko,” mam.

Se kari Judas ilak taiman mu kasuman Jesus iluman. 51 Se kari bo Jesus ilak bagaram mu ko batir woyam, ale Priest Supuling ko ura kari bo te morukko negeram ale ko dogowa siluwuram.

52 Se Jesus nu maonam, “Ni ka batir kuwim te tugumko!” mam. “Mu awuk, arikaya batir te kagersan, mu nuna batir te kuemonko. 53 Ni me ikisam, aninga Ait duruk te bagoso mu aurik, mu nu tairatela ko engel alo suen biya nunguningkiri nunga awurok se taimon ale aga sangarmonko. 54 Bare ani buta me bitirikko. E ani uwuta bitirik, mu Kaem ko batoga awuk ta nunguning aratukko? Mu mel es iwitata aratukko balam se aratoso.”

55 Asele Jesus kari motam biya mu iwita nunga maonam, “Ani tere daong kari se aga iluwalko batir tam manga ago mu giman ago taiman e? Tom kasik biya ani temple ningi dagikasam den apukasam, bare tom mu te nina ani me aga ilukasan! 56 Bare mel suen la aratam imi mu prophet alo nunga den batoga te aniso mu ko nunguning te aratukko.”

Se tom mu te ko olekem alo suen la nu beteman ale naguman.

Jesus Sanhedrin kari bibiya nomokete sanamaram

(Mark 14:53-65; Luke 22:54-55, 63-71; John 18:13-14, 19-24)

57 Kari Jesus iluman mu nuna Priest Supuling Caiaphas ko kawam te ilak namaman. Mu te mu Law Den ko kausa kari se kari supuling alo maingkala tai biguwuman ale bagaman. 58 Se Peter Jesus kowom kaoram namaram. Bare nu awar nuam aolak ilu namakaso, ale Priest Supuling mu ko kawam ko kar ningi kaparam ale kawam bitua kari arungak daigam, ale Jesus kumik te aguwaya betemonko wore ikiokko bagakaso.

59 Se kawam ningi mu priest bibiya, se Sanhedrin ko kari bibiya suen la, mu nuna kari saki Jesus den kawel te atumumon se ikimon ale te momon se kuerukko wore ko den ikiwakasan. 60 Se kari suen biya barasukasan ale den kawel kawel te atumukasan. Bare nuna memek bo ta, te nu momon se kuerukko wore me aringiman.

Bare udagi nunguningkiri kari ilagala barasaman 61 ale balman, “Kari sumu iwita balam, ‘Ani Kaem ko temple parasuwurik mu aking tom ilagala suwan te iru am kalikkowo,’ mam.” ^{▼▼Mat 26:61-63 Jesus temple ko den balam: John 2:19-21. Jesus kutek mam: Isaiah 53:7; Mat 27:12.}

62 Se Priest Supuling barasu sanamaram ale Jesus isuam, “Ni kari kimik ko den balsan bare nunga den koma baluko mena e?” mam. 63 Bare Jesus am kutek mam. Se Priest Supuling akingtala maonam, “Kaem marak bagoso wore ko nup te ani ka manorsam, ni Kaem ko Namar Kristus agi mu nanga manaruko,” mam.

64 Se Jesus nu maonam, “Ni eta balem ta! Bare ani nina suen la ninga manorsam, tom udagi nina Kari ko Kuriang Kaem Sokel Karogo mu ko kuting sengam mu te dagiwuruk se arigalko, ale duruk wonong ko taiti nuwi te taiwuruk se arigalko!” ^{▼▼Mat 26:64-68 David se Daniel nunga den: Psalm 110; Dan 7:13. Jesus bita maguwuman: Isaiah 50:6; 53:5.}

65 Jesus uwuta balam se Priest Supuling kota ko guang barukuam ale iwita balam, “Nu Kaem nup balu maguwuram! Buta se ana kari bo udagi arunak se tairuk kumik ko den saki karogo me balukko! Nina ikiman, nu Kaem balu maguwuram. 66 Se awuk balsan a?”

Se nuna balman, “Nu memek ago, am kuerukko,” maman.

67 Ale nuna Jesus koma motam ningi katingikasan ale moakasan. Se saki alo kol kuting te kulukurukasan 68 ale balukasan, “Ni Kristus, se prophet. Se awiri ka moso ya? Eng diram baluko!” makasan.

Peter balam, “Ani Jesus me ko ikisam,” mam.

(Mark 14:66-72; Luke 22:56-62; John 18:15-18, 25-27)

69 Peter kawam ko kar naung ningi aliti dagiwaram se Priest Supuling ko ura imet bo kote tairam, ale iwita nu maonam, “Ni karogotala Jesus Galilee kari wore ilak geragakasam,” mam.

70 Bare Peter kawelaram, ale nuna suen la nomokete balam, “Ni den balsam sumu ani me ko ikisam,” mam.

71 Ale nu namaram kar ko songkuring ago sanamaram. Se ura imet bo tala nu arigam, ale kari sang mu te bagaman wore nunga maonam, “Kari imi mu Jesus Nazareth kari wore ilak geragakaso,” mam.

72 Se Peter akingtala kawelaram ale balam, “Ani nunguningta balsam, kari sumu ani me ko ikisam!” mam.

73 Se tom me maiyam tala, kari mu te sanamingaman mu Peter kote pingi taiman ale manorman, “Ni me kawelerko! Ni noko bo tala!” maman. “Ni ka munak ko bala karogo kelemak, se umutang te ni wetang te aratem,” maman.

74 Se Peter den sail karogotala balam, “Nunguningta nunguningkiri, ani kari sumu me ko ikisam! Am mena biya nunguningkiri! E ani kawelirik, mu Kaem am aga morukko,” ma balam.

Se tom umutang te la tarak niaram. Se Peter Jesus ko den nu giram maonam ale balam, “Tarak me niaruk la, ni biring ani aisu ale tom ilagala suwan ko balu, ni ani me aga ikisam ma baluko,” mam, mu Peter den mu kuamin te tairam. Se ko aratam ale ninguru niakaso.

75